Glory of the Hamsters: 9/1/09

2009-09-28

成長中的來來福

來福仔大隻左D嚕, 都同我熟左唔少, 不過都仲係怕摸頭

一返屋企就見到來福用D紙覆蓋住D罪証 - 屎尿糧mixed

2009-09-27

妹妹真的很活躍

星期六去左同妹妹玩, 不過佢動作好快, 影得唔係好清

妹妹好活躍o架, 成日要出黎玩, 爬呀爬呀爬...

2009-09-22

2009-09-19

來福仔仔真面目

第1日影唔到個靚仔樣俾大家睇, 得個大蛋蛋... XD

宜家有新相啦, 來福佢都適應左D, 肯食我餵o既燕麥!!

今朝見佢咁精神拍左個video~

大蛋新伙伴來福!!

9 月 16 日, 我係金魚街紅蘿蔔見到隻好合眼緣的熊仔鼠仔仔, 不過到最後都冇帶到返屋企, 但之後又真係好掛住隻熊仔...

今日 9 月 18 日, 我唸下唸下覺得其實大家都好有緣份唔想錯過, 咁就即刻約左妹妹媽放工去睇下個隻熊仔仲係唔係度啦, 都好驚會俾人買左耶!!

同我差唔多時候都有好多人睇鼠鼠, 我即刻叫人抱起佢先, check 完身體呀屎屎呀個D, 就同個店員講聲我要先, 再放返仔仔落去等妹妹媽來...

期間有人對呀來福仔有興趣, 好彩都知道寶寶名花有主~ 就係我等妹妹媽個幾個字其間好快已經有 2 隻鼠鼠俾人買左, 希望佢地都可以遇到好好的主人啦...

跟住妹妹媽來左的時候來福仔就掛住 Zzzzzzzzzz, 隔一陣醒左再餵佢食下 D 私伙朦朦, 來福見我地餵都唔係好食, 放低粒食物後福仔就係隔離裝下裝下, 跟住就去咬咬咬咬咬啦!!

返到來一陣之後同來福仔仔影左 1 幅相咋, 但係暫時未影到個超級超級靚仔樣俾大家睇, 淨係影到佢對很大很大的蛋蛋, 好有男人味~

2009-09-12

9月9日, 我帶左招財仔去睇醫生, 一來就話要俾D氧氣佢吸, 跟住一路見BB係個氧氣罩度(好似洗梗面), 一路聽醫生講野都好心痛... 不過到最後都係唔知究竟仔仔咩事, 醫生話唔清楚實際咩原因開唔到藥, 同埋話呀仔可能過唔到24小時, 又可能有成個禮拜都唔定唔知o架... 之後俾左2個建議我地, 一係留院吊鹽水, 打皮下水針等等, 一係人道毀滅... 人道毀滅我就冇唸o架喇, 我唔想剝奪佢生存o既權利, 同埋又見佢仲想食野呢! 至於留院, 因為情況唔多樂觀, 真係唔想佢係果度冇人冇物咁走, 會好可憐... 最後就打左支皮下水針, 因為驚佢脫水, 同埋問醫生要左D HARRISON, 唸住帶仔財返屋企好好照顧佢, 陪佢行埋佢生命裡面最後o既一段路! 又或者有奇蹟等等, 唔想放棄, 另外夜晚都有餵左D益力多俾佢睇下有冇幫助...

9月10日, 凌晨同朝早我都有彈起身照顧招財仔, 覺得都係唔係咁樂觀... 又抱呀仔仔仔去看看熟悉o既陽光, 個心都唸唔知會唔會係最後一次呢? 不過好難話請完1日假又1日假, 咁就唸住冇計啦, 幾粒鐘頂硬上唯有快D返... 放工呀爸打來話餵梗呀仔飲水樽D水, 佢肯舔來飲, 咁都放心D聽落好似幾精神咁! 返到來即刻餵佢飲電解水呀食野果D呀, 呀爸呀媽都有同佢玩下支持下佢 ~ 招財行行下咬我爸, 佢好似從來都冇咬過我爸, 我都話唔通係想say goodbye? (之後佢都有試過想咬我鼻, 都有試過想咬我嘴, 不過俾我避一避咬唔到...) 跟住呀財都好活潑, 又要我抱又要去書木台, 我地都覺得會唔會真係有奇蹟呢? 冇耐我抱佢返入籠, 佢唔制, 又爬到好高, 嘩咁驚嚇我梗係即刻放佢出來啦! 但佢唔係想去書木台又唔想返籠 (宜家唸返可能想搵地方匿埋咩咩都未定...) 最後都係俾我抱左去書木台休息左一陣, 到我訓就抱返入籠摷下食物兜咁啦...

9月11日, 凌晨即係我訓左之後, 唔知幾點曾經隱約夢見仔仔B想飲電解水, 但又唔知唔係好夠力定點, 好似飲唔到咁... 到8點度我起身(本來較左7點...) 即刻望下我隔離o既呀仔啦, 望來望去都搵佢唔到, 原來佢係其中一個角落頭, 果個角落頭係我唸果時o既佢唔係咁容易去到o既位置, 應該都要大力D先得! 係匿左係屋仔後面... 離開左了... 最後依part仔仔冇俾我同佢一齊過... 雖然我好想, 但我覺得咁一定有佢o既原因, 我會理解, 我會尊重佢o既決定! 之後就同呀媽一齊親自送招財仔最後一程, 上去最終有您搞好佢o既身後事... 我冇要返D骨灰, 佢地話會有師傅送去種樹, 同埋都有整返條DNA鍊留念!

其實我都唔係話你地唸得咁傷心, 我知佢年紀大, 一早唔多唔少都有心理準備... 見到佢冇啦啦咁唔舒服個樣係好痛, 但知道佢離開前好似都好開心咁同我地玩, 又唔洗再受依D痛苦, 佢離開左我o既心情都冇睇住佢唔舒服o既時候咁沉重... 我知道我咁鍾意養寵物係要慢慢學習睇開D, 講真, 望都望係佢地走先唔係我走先, 如果唔係邊個悉心照顧佢地喎... 仲有之前我周不時同招財講如果有彩虹橋呀天堂果D, 咁可能我地第時都會再見! 而如果有投胎果D, 我都叫佢要做個善良o既人呀, 同埋愛護動物 =)

我打算繼續養鼠鼠, 睇下有冇合眼緣o既熊仔鼠仔仔, 又或者物色定有冇領養岩心水, 我都有同招財仔講過我地o既新伙伴會叫李來福 =] 我超鍾意招財來福呀, 好好聽, 名係送俾寶寶們o既第1份禮物來, 所以我都係鍾意改D好意頭o既名, 係一種祝福!