今次旅程好開心呀, 我就最鍾意第2日, 覺得最好玩, 因為有得坐車兜風去郊外, 感受一下大自然, 不過好後悔冇走落車影下個菠蘿田, D菠蘿全部都未熟o架, 好似係深綠色身紫色葉, 唔知有冇記錯, 總之場面就好壯觀! 其實仲有好多野都冇話特別走去影, 例如食過D咩咁都冇影, 見到就食唔等喇懶得影~
講下大概做過D咩啦...
第1日, 初到貴境都冇咩好做, 到夜晚就同人食飯(因為我姨媽識好多台灣人, 有D就係係個度住o既香港人, 所以有好幾餐都係同佢地一大班人咁食), 又食左D琵琶, 又幾好食喎, 埋單時有抽獎卡刷, 佢地俾我揀, 點知俾我刷到個200蚊台幣, 再用依200蚊台幣買多2張卡, 又俾我刷多400蚊台幣喎, 幾幸運呀! 跟住食完野就走左去唱K, 個度唔同香港o既, 好似歌廳咁開放式o既...
第2日, 揸車去左''關子嶺''個頭, 都成粒鐘車程, 沿途睇下風景吹下風, 好爽! 又見到菠蘿田呀, 木瓜樹呀, 芒果樹呀, 稻米呀等等, 我話佢地好厲害呀, 未熟乜都睇唔到都知係咩黎, 跟住佢話: ''我不是台北人呀'' 哈哈... 個度D田真係超大又多喎, 大開眼界!
冇耐企係條街度等人一齊去食飯o既時候, 見到有2隻狗, 黑色個隻有皮膚問題, 尤其係條尾o既根部, 佢係咁舔, 隻雪橇就俾人綁住左同架車一齊, 不停哀鳴, 可能係想出黎走走啦...
夜晚食飯就去左依度, 真係第1次見識''室外KTV'', 同埋D椅子怪怪的, 坐落去彈彈下咁... 以我連日來o既觀察, 台南人都很熱情好客, 超鍾意唱歌, 有D唱得好好聽添! 又超鍾意飲野, 好多都大大杯, 亦都鍾意食生果, 嘩佢地D生果真係好新鮮好好味o架, 個晚碟蘋果我係咁食係咁食, 真係我食過最好食o既蘋果, 仲有D芭樂(番石榴)都唔錯! 唱到差唔多尾聲, 係我好沉醉聽梗佢地唱歌o既時候, 冇啦啦個電視彈首生日歌出黎, 我先醒起: ''係喎,今曰26號係我生日'', 跟住我姨媽佢地就拎左個''生日蛋糕''出黎, 佢話個日搵唔到個似樣o既生日蛋糕, 所以就買左個唔記得叫咩名, 好把豹o架個名, 但食落好似叉燒酥, 真係咁大個女食過最特別最難忘o既生日蛋糕! 班台南人話早D同佢地講我生日嘛, 送份大禮物俾我, 我心唸: ''好彩姨媽佢地冇講你地知, 你地咁熱情我真係受寵若驚呀'' 係度講聲多謝先~
第3日, 去左唔記得邊度露天食野, 條街擺晒攤檔有好多野食o架, 其中一樣係''棺材板'', 有D似多士咁, 夾住D白汁呀, 蘑菇呀, 粟米呀, 火腿呀, 好好味o架! 跟住又係附近個大商場行下咁, 有間shop請我食左粒糖好得意o架, 出面係黑糖, 個心係話梅咁酸味味~
第4日, 去左另一個姨姨度住, 佢養左3隻狗女, 1隻係pet shop搵人要o既(臘腸混種BB), 另外2隻都係流浪過o既(土狗豬豬, 魔天使寶寶), 宜家3隻都有10歲o架喇, 要健健康康呀! 夜晚就去左1間叫''聚''o既餐廳度食火鍋(整個旅程食左3次火鍋, 不過唔同地方), 好好味, 我填佢份問卷都特別認真! 之後去左花園夜市, 有好多攤檔食野呀, 玩遊戲呀, 但係有D食野o既攤檔好唔衛生, 真係唔敢食...
第5日, 冇咩特別, 影下樓下個魚池(我好鍾意錦鯉), 跟住行下街咁, 又食左個唔知咩肉圓粉同飲左枝''鮮榨柳丁(橙汁)'', 唔錯o架! 夜晚就去左大東夜市食扒, 港紙3X蚊啦, 好好味, 忌廉湯同野飲都係任食任飲, 不過個忌廉湯連我依個咁鍾意忌廉湯o既人都係食左1碗咋, 証明係幾唔好味...
第6日, 走左去補牙+洗牙, 1500蚊台幣, 感覺都唔錯丫, 細個跌崩左都補過1次o架啦, 只係早幾年又跌崩返同一個位, 見唔覺唔覺就一直冇理佢, 雖然係門牙, 但真係唔多覺o架, 同好多人講我有隻門牙係崩左一角佢地都係唔講唔知... 同埋都係影下狗狗咁啦, 3隻裡面我最鍾意就係豬豬, 一開始就好合眼緣, 影相都係最多, BB就最活潑, 佢D爆發力真係好勁, 唔會覺得佢係老狗, 寶寶就超級痴人, 係我見過最痴人o既狗, 無時無刻都想人抱想人摸想人錫, 好sweet!
第7日, 去左食鐵板燒, 師傅手勢好快, D野食超好吃又大份, 都係港紙50蚊度! 跟住又係行街, 最後睇左1間超大型pet shop, D野貴到呢, 個WILD 381都要2千幾蚊台幣, 真係好誇張, 台北都係賣梗1200蚊唔洗, 台南要2千幾蚊, 咩會員價都要19XX蚊, 不過如果有心水就唔理得佢貴唔貴啦, 但可惜冇野岩, 都見到有D野係香港冇o架... 夜晚又去食''旺仔冰''啦(第1次食係第5晚), 係D沙冰咁, 有D小湯圓, QQ的, 又有紅豆, 綠豆之類, 都好味o架, 不過太大碗要分2次食~ 同埋仲有去食''鹽酥雞'', 超超超超超好吃! 唸起都流口水!
第8日, 去左1間話佢地話食左十幾年, 好出名o既地方食日本野, 好似叫''山根XX''唔係好肯定, 佢好勁o架, 可以見唔到個門口有名, 又或者係我大近視啦... 又係第1次係室外食日本野, 個鮭魚刺身好好味, 都係130蚊台幣, 個炸蝦卷又係超好食又大碟!
另外經我一連串o既觀察, 仲發覺到一D有趣野: (1)台南D樓係比香港更密密麻麻, 只係冇咁高, 同埋好多一棟樓可能係有兩三隻色, 而個兩三隻色係有少少九唔搭八咁 (2)佢地D車架架都係出面睇唔到入面, 聽講話防曬唔知真定假 (3)周圍都超多電單車, 男女老幼都會揸, 我覺得直情多過私家車囉, 仲有D人係用腳夾住隻狗一齊坐電單車, 見過2隻狗一齊都有, 好危險
總結, 我係好鍾意台南o既, 覺得好舒服, 生活節奏亦都慢D, 個人放鬆好多, 好想再去玩, 不過個度交通真係好唔方便, 佢地都話唔可以自己冇車...
仲有呀, 我早2日已經開左個''酥鄉''芥末花生食, 超超超超超好味道呀, 真係一路食一路眼濕濕都停唔到口! 唔知香港有冇邊度有得買呢? 好想食~ 同埋都試左個地瓜條(蕃薯), 甜甜地唔錯啦, 但係就硬左D~
P.S.
我接返來福仔仔返屋企個時佢好親我好似好開心咁呀, 好溫馨啊!!
